Մեր DJ դասընթացներին մասնակցելիս մարդկանց ամենատարածված հարցն այն է, թե «որտեղի՞ց պետք է սկսի սկսնակը»։ Տեղեկատվության անծայրածիր ծով՝ ֆորումներ, YouTube, հոդվածներ, բլոգներ: Շատ հեշտ է շփոթվել այսքան աղբյուրների մեջ։ Այդուհանդերձ, օգտակար խորհուրդները համակարգված չեն, որն էլ պահանջում է, որ դուք մանրակրկիտ ուսումնասիրեք ահռելի տեղեկատվություն՝ անհրաժեշտը գտնելու համար:
Ինքնուրույն սովորելը կարող է երկարատև և ձանձրալի լինել։ Երբեմն դժվար է անել առաջին քայլը, դժվար է հասկանալ, թե ինչ է անհրաժեշտ մեկնարկելու համար։ Լավագույն տարբերակը դիմելն է այն մասնագետներին, ովքեր անցել են այս փշոտ ճանապարհով և կսովորեցնեն ձեզ այս մասնագիտության նրբությունները։ Մեր դասընթացի մասին ավելի շատ տեղեկություն կարող եք գտնել այստեղ։
Նախքան DJ-ինգ սովորել սկսելը
Մինչև սովորել սկսելը կարևոր է հստակեցնել ձեր նպատակը: Ինչո՞ւ եք ուզում DJ-ինգով զբաղվել: Այն հոբբի՞ է, հաճելի զբաղմո՞ւնք, թե՞ ուզում եք այն դարձնել հիմնական մասնագիտություն: Արդյո՞ք DJing-ը կլինի եկամտի աղբյուր, թե՞ ուզում եք փորձել ինչ-որ նոր բան և զվարճանալ: Ահա այս հարցերի պատասխաններն էլ կորոշեն դասընթացի նկատմամբ ձեր մոտեցումը, ձեր ապագա առաջընթացը: Իսկ ամենակարևորը՝ հաշվի առնել սարքավորումներ գնելու ֆինանսական ծախսերը:
Եթե ուզում եք հաջողության հասնել, պատրաստ եղե՛ք ջանքեր և գումար ներդնել ձեր հմտությունների զարգացման համար: Ոչ մի պրոֆեսիոնալ երաժիշտ չի կարող աշխատել առանց բարձրորակ սարքավորումների: Հմտությունները ձեռք կբերեք դասընթացի շնորհիվ, բայց անհրաժեշտ կլինի գումար ծախսել սարքավորումների և առաջխաղացման վրա: Այո, երաժշտական ոլորտում անուն կերտելը պահանջում է ներդրումներ, այնպես որ լուրջ վերաբերվե՛ք դրան: DJ-ինգը շոու բիզնեսի եզակի ճյուղ է. առանց գրագետ PR-ի (գովազդ) գլուխ չեք հանի:
Դուք պետք է ոչ միայն ցանկանաք զարգանալ, այլև տարված լինեք ձեր մասնագիտությամբ, անկեղծորեն սիրեք այն, ինչ անում եք, և ձեր ժամանակն ու էներգիան նվիրեք դրան: Պատրա՞ստ եք երեկոներն անցկացնել եռուն պարահրապարակներում և մասնակցել փառատոների: Այս ապրելակերպը պետք է ձեզ դուր գա, եթե ուզում եք ելույթ ունենալ հանրության առջև:
DJ դասընթացին զուգահեռ
Դուք սահմանել եք ձեր նպատակը, ժամանակն է առաջ շարժվել այս հետաքրքիր ճանապարհով:
Կարևոր է որոշել, թե որ ուղղությամբ եք ուզում գնալ։ Ընտրե՛ք երաժշտության ոճ, որը կցնցի պարահրապարակը։ Կենտրոնացե՛ք ձեր երաժշտական ճաշակի վրա և ուսումնասիրե՛ք հանրաճանաչ միտումները։ Մշտապես ընդլայնե՛ք ձեր երաժշտական հորիզոնները ու համալրե՛ք կոմպոզիցիաների գրադարանը։ Եթե վստահ չեք, թե ինչ ընտրել, լսե՛ք տարբեր ոճի երգեր։ Գտե՛ք ձեզ ամենահարմարը։ Օգտագործե՛ք հայտնի երաժշտական հարթակներ և գտե՛ք ձեր ոճը։
DJ սարքավորումներ։ Սկսե՛ք նվազագույնից։ Ընտրե՛ք հզոր նոութբուք, որը կարող է աշխատել DJ մասնագիտացված ծրագրաշարով։ Գտե՛ք բարձրորակ ականջակալներ՝ ձայնի լավ վերարտադրությամբ։ Ծրագիրը հեշտությամբ կառավարելու համար ձեզ անհրաժեշտ կլինի DJ կառավարիչ՝ ներկառուցված ձայնային քարտով։ Տանը աշխատելու համար գնե՛ք մի զույգ ստուդիայի մոնիտոր: Հետագայում ձեզ անհրաժեշտ կլինի հեռակառավարման վահանակ և նվագարկիչ։ Բարձրորակ սարքավորումները թանկ են, ուստի կարևոր է գնելուց առաջ փորձարկել տարբեր մոդելներ և ընտրել ճիշտը։ Մեր DJ դասընթացների ժամանակ դուք կծանոթանաք տարբեր սարքավորումների հետ և կհասկանաք, թե ինչ է ձեզ անհրաժեշտ աշխատանքն ինքնուրույն շարունակելու համար։ Մի՛ շտապեք թանկարժեք սարքավորումներ գնել։ Նախ փորձե՛ք և որոշե՛ք, թե ի՞նչ է ձեզ անհրաժեշտ։ Մեր մասնագետը դասերի ընթացքում միշտ կօգնի ձեզ ընտրել ճիշտ սարքավորումներ:
DJ-ինգի մեջ ամենակարևորը գիտելիքն է
Հնարավոր է ունենաք պարզ նոութբուք և կարողանաք նվագել ակումբի ստացիոնար սարքավորումներով, բայց չեք կարող գլուխ հանել առանց գրագետ միքս ստեղծելու ունակության: Սարքավորումներն ու ծրագրերը կարելի է գնել, բայց գիտելիքը փորձի հետ է գալիս: Առաջադեմ սարքավորումները չեն փրկի այն երաժշտին, ով չգիտի, թե ինչպես ճիշտ միքս անել: Հետևաբար, առաջին բանը, որի վրա պետք է կենտրոնանա սկսնակը, դասընթացն է:
Եթե պատրաստ եք սկսել սովորել, ապա միացե՛ք մեր «DJ Start սկսնակների համար» դասընթացին և ընդամենը 1.5 ամսում ձեռք կբերեք համապատասխան գիտելիքներ այդ ոլորտում աշխատանք գտնելու և այն լիարժեք իրականացնելու համար: